Chao Long Beef Stew Noodle Soup

KEENA MAE L. TAN

Kapag naririnig ko ang Chao Long aking naaalala ang mga panahong ako’y nasa hayskul. Ako’y nagulat ng niyaya ako ng aking mga bagong kaklase, na aking mga kaibigan at kabarkada na ngayon, na kumain sa Chao Long noong kami pa ay nasa ikatlong taon sa hayskul. Ang aking unang naisip ng mga panahong iyon ay ‘Ano iyon?’ dahil rin sa kadahilanang ako’y bago pa lamang sa bayang iyon. At dahil sa aking kagustuhang malaman kung ano ito ay sumama na ako. Kami ay nakarating sa ‘Bonas’, na isang sikat na kainan roon, at inirekomenda nila sa akin na tikman ang Beef Stew. Nang aking matikman ito, ako ay nasarapan at di kalaunan ay hinanap hanap ang ‘sensation’ na dinudulot nito sa aking dila. Ito ay matamis-tamis at malinamnam na ‘noodle soup’.

‘Chao Long Beef Stew noodle soup' o kilala sa tawag na ‘Bún bò Huế’ sa Vietnam na isang Vietnamese Cuisine na aking unang natikman sa ngayo’y aking itunuturing na tahanan, sariling bayan na Puerto Princesa sa Palawan. Karaniwang matatagpuan ito saan mang lugar sa bayan, ngunit popular itong kainin sa mga kainang VietVille, Saigon at Bonas.

 Sa aking pagsasaliksik, ito pala ay tinatawag sa Vietnam na Bún bò Huế at ang mga pangunahing sangkap pala nito ay ang baka na pinakuluan, ang ‘rice noodles’ na kadalasang sila rin ang gumagawa, ang achuete na nagbibigay ng kulay dito, at iba pang mga sangkap. Ito ay kadalasang ihinahain kasama ng mga toge(bean sprouts), ‘mint leaves’ at kalamansi. Masarap din ito kapag umorder ka ng ‘French bread’.  Ang ‘French bread’ ay maaaring plain o may palaman tulad ng Beef, Pork, Chicken, Tuna at Egg. Ito ay masarap kainin kapag tag-ulan, ngunit sa kalagayan ng aking mga kabarkada ay kung kelan naming gusto ay kakain kami rito. Masarap ang Chao Long sapagkat ang ‘noodle’ nito ay di pangkaraniwan, ito ay may kakaibang ‘texture’ at kasama nito ay ang malinamnam na sabaw na mahihigop.

Kapag gusto niyong matikman ang ‘noodle soup’ na ito na aking kinagigiliwan ay pwede niyo itong matikman sa aming bayan na mabibili sa halagang 40-50 pesos lamang. Ngunit kung ayaw niyo namang mapalayo rito sa Metro Manila, ay maaari niyo itong matagpuan sa mga sikat na pamilihan at hanapin ang kainang ‘Pho Hoa’ na mabibili sa halagang 200 pesos pataas. Inirerekomenda ko na kapag kayo ay bumisita sa aming bayan ay huwag niyong kalimutan na bumisita sa isa sa mga kainan ng Chao Long o mga Chaolongan. Kasabay nito ay kumain kayo kasama ang mga taong nagpapasaya sainyo at minamahal ninyo. Happy Eating!