Ginataang Hipon

Justine Diandra B. Mangalindan

    Sino ba naman ang hindi magugutom niyan kung ang nakahanda sa inyong hapagkainan ay ang inyong paboritong pagkain? Lalo na't kung ikaw ay galing sa inyong eskwelahan na maraming kailangang gawin at tapusin, sa inyong trabaho o di naman kaya'y sa isang nakakapagod na "lakwatsahan". Halos lahat sa atin ay mahilig kumain. Mas masaya pa nga itong gawin kung kasalo mo ang iyong pamilya o di naman kaya'y ang iyong mga kaibigan.
    

    Katulad ng iba, marami rin akong paboritong pagkain. Isa sa mga ito ay ang Ginataang Hipon. Ang ginataan ay gawa sa katas ng niyog o sa Ingles ay tinatawag na "coconut milk". Ang mga sangkap na kakailanganin sa pagluto ng Ginataang Hipon ay ang mga sumusunod: hipon, katas ng niyog, kalabasa, sitaw, bagoong, patis, bawang at sibuyas. Madali lang lutuin ang Ginataang Hipon. Gigisahin muna ang sibuyas at ang bawang. Tapos ay ilalagay na ang gata at ilalagay na ang hipon. Sumunod naman ang mga gulay tulad ng kalabasa at sitaw. Pagkatapos ay ilalagay ang bagoong. Hintayin lang na ito ay maluto at maaari ninyo ng ihanda ito.
    

    Sa tuwing nakahanda na ang Ginataang Hipon sa aming hapagkainan, ako'y hindi na makapaghintay na kumain nito. Kung minsan nga, sa sobrang gutom ko, inuunahan ko na ang aking magulang, kapatid at ang aming kasambahay. Kapag ako'y kumuha na ng Ginataang Hipon, palagi kong naaalala ang turo sa akin ng aking tatay na pisain ko ang kalabasa gamit ang tinidor tapos ay ihalo sa kanin na may sabaw upang mas lalo pa itong sumarap. Para sa akin, ito ay masarap at masustansya dahil sa mga gulay na kasama rito.

    Kung gusto ninyong matikman ang Ginataang Hipon, maaari kayong magluto sa inyong bahay o di naman kaya'y kumain sa karinderya kung ayaw ninyong mapagod sa pagluluto at ang gusto ninyo ay nakahanda na at kakainin ninyo na lamang. Siguro naman, mayroong nagtitinda ng Ginataang Hipon sa mga seafood restaurants.

    Ako talaga ay ginaganahan kapag ito ang aming ulam. Kahit ito ay simple lang tignan, parang mabubuhay ka kapag tinignan mo rin ang iba't ibang kulay ng mga sangkap dito.