SINIGANG NA BABOY

Sa tuwing ako’y nanghihina sa pagod dulot ng isa’t kalahating oras na byahe galing sa eskwela pauwi sa aming tahanan mula sa Unibersidad ng Santo Tomas. Ang isip at sikmura ko’y nagmimithing makalasap at makahigop ng masarap na sabaw ng sinigang. Naiisip ko pa lamang ito habang ako’y papauwi ay gusto ko ng lumipad patungo sa aming tahanan para magpaluto sa aking mapagmahal na ina ng paborito kong ulam. Kahit ako’y pagod na pagod sa maghapong gawain sa eskwela basta’t sinigang ang ulam anuman ang mangyari ako’y kakain at kakain. Kadalasan kasi dulot ng pagod hindi ko na magawang kumain at naisin na lamang na magpahinga at matulog para mag-ipon ng enerhiya sa panibagong bukas na haharapin.

Ang sinigang ay isang lutuin at pagkaing Pilipino na kadalasang may sangkap ng karne o isda. Ito ay isa sa mga paboritong putahe ng mga Pilipino. Hindi ito nawawala sa hapag kainan ng bawat pamilyang Pilipino sa tuwing nagkakaroon ng salo-salo. Pangunahing katangian ng lutong ito ay ang kaniyang maasim na sabaw. Karaniwang sinasahugan at tinitimplahan ito ng mga maasim na prutas, tulad ng sampalok, kamyas, o bayabas. Mayroong iba’t-ibang klase ng sinigang, tulad ng sinigang na baboy, sinigang na manok, sinigang na hipon, sinigang na sugpo, sinigang na isda, sinigang na baka, at sinigang na mga gulay na may alamang. Ang mga nagbibigay lasa naman na pampaasim ay sinigang sa miso, sinigang sa bayabas, sinigang sa sampalok, sinigang sa santol, sinigang sa limon, sinigang sa kamiyas, at sinigang sa mangga.

Ang paborito ko sa lahat ng klase ng sinigang ay sinigang na baboy. Ang pangunahing sangkap nito ay baboy (kasim o buntot), bawang na pinitpit, sibuyas na hiniwa ng maninipis, kamatis na hiniwa ng pahilis, bagoong isda, sampaloc, gabi, sitaw, labanos, kangkong, at siling pari. Walang eksaktong sangkap ang sinigang na baboy sapagkat may iba’t-ibang istilo o pamamaraan ng pagluluto ng sinigang na baboy sa bawat lugar sa Pilipinas.

Nang una kong matikman ang sinigang na baboy ng aking lola. Ako’y sarap na sarap sa kanyang luto. Sabaw pa lang ulam na. Kahit sinigang na baboy ang kainin ko sa umaga, tanghali at gabi ay hindi pa rin ako nagsasawa. Lalo na kapag malamig ang panahon, masarap humigop ng mainit na sabaw na magbibigay init sa iyong buong katawan. Pagkagat ko pa lang sa malambot na baboy nito’y pakiramdam ko’y pumapalakpak ang tenga ko sa sarap sundan mo pa ito ng paghigop ng maasim na sabaw na parang kinikiliti ka sa asim. Nagbibigay anghang pa ang labanos at siling pari para lalong lumabas ang lasa at gumuhit ito sa iyong lalamunan. Samahan mo pa ng gabi na nagpapalapot sa sabaw na tumutulong sa pagpapasarap ng bawat higop mo sa sabaw.

Kaya kong harapin kahit anong klaseng gawaing uubos ng akong enerhiya sa katawan basta may sinigang na baboy na magbibigay lakas sa akin at magbibigay ng ngiti sa aking mga labi kapag ako’y busog na.